INNFORM á Íslandi
INNFORM stendur fyrir Innovative Forms of Organizing. Um er að ræða alþjóðlega rannsókn á þróun í skipulagi fyrirtækja, stefnu þeirra og starfsáherslum sem unnin var frá University of Warwick undir forystu dr. Andrew Pettigrew, sem nú starfar sem prófessor og deildarforseti Viðskiptaháskólans við University of Bath. Að rannsókninni kom fjöldi fræðimanna frá ýmsum löndum. Andrew Pettigrew hefur gefið leyfi fyrir því að rannsóknarsniðið og INNFORM spurningakönnunin sé notuð hér á landi og verkefnið miðar að því afla þekkingar á þróun fyrirtækja á Íslandi og setja þá þekkingu í samhengi við niðurstöður rannsóknanna erlendis.
Að rannsókninni vinna Runólfur Smári Steinþórsson, prófessor, Einar Svansson, MS nemi, og Hilmar Sigurbjörnsson, MS nemi.
Stefna í raun og veru
‘Stefna í raun og veru' stendur fyrir ákveðinn samnefnara og tiltekna áherslu í rannsóknum á stjórnun og stefnumótun ("Strategy as Practice") sem er að ryðja sér til rúms. Þessi áhersla á vaxandi fylgi að fagna í Evrópu og á Norðurlöndunum og er fyrir marga rannsakendur eins konar birting eða tilurð á samhengi fyrir rannsóknir þeirra hin síðari ár. Rannsóknarverkefnið ‘stefna í raun og veru' miðar að því að gera fjölbreyttar og víðtækar raunrannsóknir á stjórnunarháttum, skipulagi og stefnumiðaðri stjórnun fyrirtækja og stofnana hér á Íslandi. Jafnframt er ætlunin að vinna úr raunrannsóknunum framlag til fræðanna um stefnumiðaða stjórnun. Með rannsóknarverkefninu er einnig ætlunin að taka virkan þátt í því alþjóðlega fræðasamfélagi sem er um ‘stefnu í raun og veru'.
Að rannsóknarverkefninu vinna Runólfur Smári Steinþórsson, prófessor, og Einar Svansson MS nemi.
Aðlögun íslenskrar stjórnsýslu að gerðum og regluverki Evrópusambandsins og Evrópska efnahagssvæðisins
Rannsóknarverkefnið byggir á þátttöku í norrænu samstarfi um samanburðarrannsóknir á aðlögun stjórnsýslunnar á Norðurlöndunum að tilskipunum og regluverki Evrópusambandsins og Evrópska efnahagssvæðisins. Rannsóknin er spurningakönnun sem send er til ráðuneyta og stofnana. Rannsóknin var fyrst gerð 1998 á hinum Norðurlöndunum og 1999 hér á landi. Spurningalistinn hefur nú verið sendur út aftur (2003-2004) og um þessar mundir er verið að vinna úr nýjum svörum. Þegar hefur fjöldi greina, bóka og bókarkafla verið birtur um rannsóknirnar.
Að rannsóknarverkefninu vinna Runólfur Smári Steinþórsson, prófessor, Baldur Þórhallsson, dósent (félagsvísindadeild) og Per Lægreid prófessor (Stein Rokkan Centret og Universitet i Bergen)