Háskóli Íslands

Vorráðstefna 2017

Viðskiptafræðistofnun Háskóla Íslands stendur fyrir Vorráðstefnu

um rannsóknir í viðskiptafræði, miðvikudaginn 19. apríl 2017. Þetta er áttunda vorráðstefnan sem Viðskiptafræðistofnun heldur en að þessu sinni verður hún tvískipt. Fyrri hluti hennar verður helgaður viðfangsefninu taugavísindi í viðskiptafræði (neuroscience in business) og þar munu innlendir og erlendir sérfræðingar fjalla um hvernig taugavísindi eru notuð í markaðsmálum og stjórnun. Síðari hluti hennar verður með hefðbundnari sniði og þar verður hægt að kynna ritrýndar sem óritrýndar greinar. Enn fremur er leitað eftir tilboðum um að skipuleggja málstofur, þar sem gæti bæði verið um hefðbundin erindi að ræða en einnig annars konar innlegg, t.d. erindi úr atvinnulífinu eða pallborðsumræður.

Um ritrýndar greinar

Óskað er eftir greinum á öllum sviðum sem tengjast viðskiptafræði. Hver grein verður ritrýnd af tveimur einstaklingum („tvíblind ritrýni“). Ritrýnar leggja mat á nýmæli greinarinnar, hvernig rannsóknarspurningar eru settar fram og þeim svarað, hvernig unnið er með gögn og staðið að úrvinnslu (ef slíkt á við), auk uppbyggingu greinar og málfar. Greinar skulu að hámarki vera 10 blaðsíður að lengd (3500 orð án heimildarskrár) og efni þeirra má ekki hafa birst áður eða vera í ritrýniferli hjá tímariti. Hver og einn getur verið höfundur að tveimur erindum en einungis séð um eina kynningu á ráðstefnunni. Ritstjórn tekur endanlega ákvörðun um samþykki greinar og þar með flutnings erindis. 

Rafrænt ráðstefnurit

Um erindi án ritrýndrar greinar
Í þessu tilviki sendir einstaklingur inn ágrip og ákvörðun um að erindið verði flutt á ráðstefnunni byggist á útdrættinum. Ágripið á að vera milli 200-300 orð og að í þeim eiga að koma fram eftirfarandi upplýsingar: 1) tilgangur greinar/erindis, 2) aðferðafræði, 3) helstu niðurstöður og 4) frumleiki rannsóknarinnar og/eða gildi niðurstaðna. Ritstjórn tekur ákvörðun um þetta.

Um tilboð um að skipuleggja málstofur
Þeir sem hafa áhuga á að skipuleggja málstofur senda um það tilboð þar sem greint er frá því í stuttu máli um hvað málstofan (eða tvær málstofur) fjallar og útgangspunkt við skipulagningu hennar. 

Helstu dagsetningar 

· Þeir sem hafa áhuga á að skipuleggja málstofu(r) sendi tillögu um það sem fyrst, en ekki seinna en 16. desember 2016.

· Síðasti skiladagur ágrips er 11. janúar 2017 (businessresearch@hi.is ).

· Síðasti skiladagur ráðstefnugreina er 1. febrúar 2017, (businessresearch@hi.is). Höfundar eru beðnir um að kynna sér vel reglur um uppsetningu greina og fylgja þeim. Sjá leiðbeiningar hér

· Höfundar fá svar eigi síðar en 10. mars 2017 um hvort grein er samþykkt

· Skipuleggjendur málstofa verði komnir með tilbúna málstofu 10. mars 2017

· Dagská verði kynnt 10. apríl 2017.

· 19. apríl 2017: Ráðstefnan

Þú ert að nota: brimir.rhi.hi.is