Rannsóknamiðstöðvar
Innan Viðskiptafræðistofnunar er á hverjum tíma unnið að ýmiss konar rannsóknum. Stofnunin hefur í gegnum tíðina lagt áherslu á alþjóðlegt rannsóknasamstarf og leggur metnað sinn í að viðhalda góðum tengslum við erlenda fræðimenn um leið og stöðugt er unnið að því að mynda ný tengsl, bæði erlendis og innan lands.
Reglulega tekur stofnunin að sér tímabundin þjónustuverkefni af ýmsu tagi, s.s. álitsgerðir, úttektir og markaðsrannsóknir. Tengsl stofnunarinnar við marga af helstu fræðimönnum landsins á sviði viðskipta gera það að verkum að stofnunin er í stakk búin til að taka að sér fjölbreytt verkefni á sviði viðskiptafræða, hvort heldur sem um er að ræða stór eða smá verkefni.
Verkefni og nýsköpun
Vefurinn hefur verið uppfærður en lesa má um fyrri rannsóknir á vefsafni með því að smella á hlekki.
- Rannsóknir um menningu og samfélag þar sem áhersla er lögð á hlutverk menningar í hagrænum skilningi.
- Rannsóknir um stjórnun og stefnumótun þar sem áhersla er m.a. lögð á starfshætti, aðferðir og beitingu ýmiss konar aðferðafræði í stjórnun og stefnumótun.
- Rannsókn um hvata innan fyrirtækja til að stuðla að jafnrétti kynjanna á vinnustað. Rannsóknin er unnin í samstarfi við fjölmörg Evrópulönd og er styrkt af Evrópusambandinu.
Íslenski sjávarklasinn hófst sem verkefni innan Háskóla Íslands árið 2010 en er nú orðið að full starfandi fyrirtæki sem stuðlar að tækifærum og styrkir tengslanet milli fyrirtækja í haftengdri starfsemi á Íslandi og um allan heim. Samstarfsaðilar klasans eru stjórnendur í fyrirtækjum sem eru í fremstu röð á sínu sviði í haftengdri starfsemi og öðrum greinum.
Markmið Íslenska sjávarklasans er að tengja fólk og fyrirtæki innan haftengdrar starfsemi og sækjast eftir nýjum tækifærum á mismunandi sviðum og svæðum. Eitt af fyrstu verkefnum klasans var að kortleggja haftengda starfsemi og var það verkefni kynnt með skýrslu í nóvember 2011.
Sem stendur vinnur Íslenski sjávarklasinn að nokkrum stórum verkefnum og má þar nefna: North Atlantic Marine Cluster Project sem gengur út á samstarf sjávarklasa kringum Norður Atlantshafið, Codland fullvinnsluverksmiðja og rannsókn á nýtingu þorskafla við Norður Atlantshafið.
Verkefni má nálgast á vef Íslenska sjávarklasans.
